Chalay Jo Ho Tu Bata Ke Jaao..
Ke Kitni Shamain Udass Ankhon Main Katni Hain..
Bata Ke Jao K Kitne Soraj Azaab Raston Ko Dikhane Hain...
Ke Kitne Mehtaab Sard Raton Ki Wus'aton Say Nikalne Hain...
Batao Ke Jao Ke Chand Raton Main Waqt Kaise Guzarna Hai..
Khamosh Lamhon Main Tujh Ko Kitna Pukarna Hai..
Bata Ke Jao Ke Kitne Lamhe Shumar Karne Hain....
Hijraton Ke Kitne Mausam Aik Aik Kar Ke Judiyon Main Guzarne Hain...
Bata Ke Jao Ke Panchiyon Ne Akailay Pan Ke Sabab Jo Pocha Tu Kia Kahon Ga?
Bata Ke Jao Ke Main Kis Se Tera Gila Karon Ga?
Bichar Ke Tujh Se Aye Habeeb Kis Se Mila Karon Ga?
Bata Ke Jao Ke Ankh Barsi Tu Kon Moti Chuna Karay Ga?
Udas Lamhon Main Dil Ki Dharkan Suna Karay Ga..
Bata Ke Jao Ke Mausamon Ke Payam dayne Hai K Nahin Hain...
Bata Ke Jao Ke Kis Pe Hai Aitbaar Karna...
Ke Kis Ki Baton Peh Bayniyazi Silsilay Ikhtiyar Karnay Hain...
Bata Ke Jaao Ke Ab Rawaiyon Ki Chaal Kia Ho?
Jawab Kia Ho?
Sawal Kia Ho?
Urooj Kia Ho?
Sawal Kia Ho?
Nigah, Rukhsaar, Zulf, Chehra, Nidhaal Kia Ho?
Bata Ke Jao Ke Meri Halat Peh Chandni Khilkhila Pari Tu Main Kia Karon Ga?
Bata Ke Jao Ke Meri Soorat Per Teergi Muskura Pari Tu Main Kia Karon Ga?
Bata Ke Jao Ke Tum Ko Kitna Pukarna Hai?
Bichar Ke Tujh Se Ye Waqt Kaise Guzarna Hai?
Ujaarna Hai?
Nikhaarna Hai?
Badan Ko Kitna Sanwarna Hai?
Chalay Jo Ho Tu Bata Ke Jaao
Ke Lautna Bhi Hai Ya......??


(Dr.Bukhari)